იტალიაში, 22 წლის ალბანელი ილარია სულას მკვლელობის შესახებ, რომლის ცხედარი ტყეში, ჩემოდანში იპოვეს, ახალი დეტალები გაირკვა.
როგორც იტალიური მედია წერს, ალბანელი სტუდენტის მკვლელობისთვის მისი ყოფილი შეყვარებული, 23 წლის ფილიპინელი ბიჭი დააკავეს.
მარკ სამსონმა შეყვარებულის სასტიკი მკვლელობა აღიარა. როგორც მან გამოძიებას უთხრა, გოგონა საკუთარ სახლში მოკლა, შემდეგ კი ცხედარი ჩემოდანში ჩადო და მანქანით ტყეში წაიღო. დაკითხვის შემდეგ სამსონმა გამომძიებლები დედაქალაქიდან 40 კილომეტრში, იმ ადგილისკენ წაიყვანა, სადაც ის ჩემოდანი დამალა, რომელშიც ცხედარი იყო.
ახალგაზრდამ ასევე თქვა, რომ მკვლელობის იარაღი, დანა ნაგვის ურნაში, მობილური ტელეფონი, კი მონტესაკროს რაიონში, ჭაში ჩააგდო. აღნიშნული ნივთები პოლიციას ჯერ არ უპოვია.
ამასთან, როგორც გაირკვა, დანაშაულის შემდეგ მარკ სამსონმა ილარიას მობილური ტელეფონიდან სოციალური ქსელები წაშალა. ეჭვების გასაფანტად კი, ილარიას მეგობრის სახლში მივიდა და თავს აჩვენებდა, თითქოს, გოგონას გაუჩინარების გამო შეწუხებული იყო.
ახლა გამოძიება მუშაობს იმაზე, ჰყავს თუ არა სასტიკ დანაშაულში თანამონაწილეები სტუდენტის მკვლელობის ბრალდებით დაკავებულ ფილიპინელ ახალგაზრდას. მიმდინარეობს მტკიცებულებების გამოკვლევა, იცოდნენ თუ არა დანაშაულის შესახებ ბიჭის მშობლებმა, რომლებიც, მკვლელობის დროს, სახლში იმყოფებოდნენ.
ილარია სულა სან-ლორენცოს საუნივერსიტეტო რაიონში, ოთხ სტუდენტ გოგოსთან ერთად ცხოვრობდა. ის სახლიდან სამშაბათს, 25 მარტს, საღამოს 21:30 საათზე, მეგობრებთან დამშვიდობების გარეშე გავიდა.
„მას ჩვენთვის არ უთქვამს, სად მიდიოდა. უცნაური არაფერი შეგვიმჩნევია“, – ამბობენ 22 წლის გოგოს მეგობრები.
რაც შეეხება ბიჭს, რომელიც მეგობარი გოგოს მკვლელობისთვის არის დაკავებული, ამბობს, რომ ის და ილარია ერთი წელი იყვნენ ერთად, შემდეგ კი დაშორდნენ.
სასტიკი დანაშაულის მოტივი უცნობია.
